司儀？主持？

不就是靠把口在台上說說笑笑就有錢收的工作嗎？

近年，澳門各大機構、酒店、賭場及多個政府部門均舉辦不同類型的活動，往往發現司儀人才難尋，亦因此在澳門興起了一片司儀培訓班、司儀比賽等熱潮，年青人於這個火熱起來的司儀行業均投下期待及支持的一票，那麼，要怎樣投身這個行業，以至在行業內發光發熱？

澳門筍工網 X 戴顯揚Jose 同你一一分析！

說到澳門的司儀界別，Jose可以說是不可不提的代表人物，其已覆蓋了澳門不同種類的司儀工作，特別是很多需要用到英文主持的活動司儀更指定要Jose擔任，Jose近年亦積極開班授徒，分享他於工作上的心得及經驗。那麼，司儀這一個行業是否真的如外界所想 – 有稿照讀 / 懂得說話便可上台做司儀？「坦白講作為一個專業司儀邊有可能咁簡單上台講兩句就得、又要睇觀眾反應、又要場面控制，又要計時。」Jose 認為司儀的功能就是令整個活動能流暢及完整地反映給觀眾，而同時又要兼顧活動的氛圍及觀眾的反應，特別是一些大型活動更需要做足功課。




咁到底做一次司儀係咪搵好多錢？

上司儀班係咪真係有用？

有一定經驗的司儀平時可以點樣訓練？

就由以下的快問快答為大家掀起司儀行業的面紗。



筍工：點樣睇澳門的司儀發展？

JOSE：其實對比起其他地區，澳門的司儀業界都算係比較集中係啲大型活動上，特別係政府同埋大型企業，加上澳門地少人多，所以舉辦開的大型活動大致上都有限。澳門司儀的發展通常一係同電視台簽約做電視節目主持，或者同婚禮公司簽咗的專業婚禮司儀，公關公司同埋博彩企業的司儀，佢地可能係一個月包薪或逐場計，都可以好似我咁自僱，流動性大啲，可以周圍接show，但就相對地冇咁保障到收入。其實澳門司儀的發展空間仍然好大，同埋會比較依賴經濟環境，但係澳門的經濟大環境要配合政府對旅遊博彩業的整體政策，好似近期賭稅出現下滑，大家投放係活動的budget相對應地減少，連帶司儀的工作都相對地減少。


*司儀業之比較

司儀這一行業在澳門鄰近的城市其實早就已有一定的發展，彼岸的香港因為電子傳媒的發達從而孕育出多位於亞洲享負盛名的司儀界人才，他們可以說是司儀界別中的佼佼者，香港基於世界華人地位上的特殊性亦令他們造就出全方位的機會給業界發展。台灣的司儀則著重電視業務上的表現，近年台灣的司儀亦多了很多不同的校園及社區活動的演出。而在中國內地，特別是廣東省，專業司儀除了是大型活動會起用之外，婚禮司儀亦在國內起了一場小旋風，一大堆單靠做婚禮司儀也能打響名堂的人在國內近年紛紛掘起。反觀澳門會起用專業司儀的則主要是娛樂業務及政府機構。


筍工：做司儀其實賺唔賺到錢？

JOSE：每一個唔同的活動其實都會有唔同budget，通常專業司儀show錢係比較高，一場show可能有幾千蚊，但係主辦單位就會要求高返啲，除咗要完全了解活動內容同宗旨，臨場反應要快，服裝(自備)要配合活動主題外，有時活動內容同流程都有可能要我地諗下點修改會順暢啲同比埋意見，付出的準備時間並非台上眼見的一兩個鐘頭咁簡單。加上澳門唔係好多大型活動舉辦，可能一個月得一兩個，澳門司儀人才不少，所以並唔係外界諗咁好搵。



筍工：司儀行業難唔難入行？

JOSE：澳門的司儀其實好被動，大型活動來來去去都係果幾個人，政府同埋大機構鍾意搵一D係澳門已有一定知名度的司儀，所以一些新入行或年資尚淺的司儀要打入那些大型的活動或品牌，除咗本身的自我準備要充足外，還需要豐富多一點司儀以外的履歷，好像要十項全能才可以有獲得機會。我自己本身都係澳門作多元發展，都有參與唱歌、舞台劇、電視的演出，為的就是希望令自己可以更深入到澳門的各群眾層。所以我覺得係澳門要做司儀，最少要用一兩年時間，打好個底，先會有工作搵你。



筍工：你平時點訓練同提昇自己的司儀談吐技巧同能力？

JOSE：多睇，多觀察，同埋要培養自己的個人特色！多睇係指要睇多啲人地做司儀的表現，學習好的地方；觀察同留意生活上的細節、對社會時事的觸角，因為通常運用身邊的事物作為例子最能引起觀眾共鳴。可以的話建議錄影自己的表現再睇返，同埋聽多啲人地意見，咁先知自己有咩要改進。同埋要不斷自我進修，咁樣先可以係唔同時期帶到啲新野比觀眾，好似我之前去咗香港跟黃秋生學戲，真係獲益良多。



筍工：其實司儀班教啲咩?

JOSE：其實司儀班除咗一般教下司儀技巧外，最重要我覺得係分享經驗，因為大家係不同舞台上的領悟先係最重要的交流，亦係最難能可貴的體驗。所以如果係我教的司儀班，我會share好多我的經驗，或者係執生技巧。



筍工：初入行者，你會比啲咩建議佢地去搵job？

JOSE：初入行者當然要有足夠的培訓，可以的話準備定一份「學力」去send比各大公關公司同政府機構。點解係「力」唔係「歷」，因為我覺得你要話比人知你的「力量」係去到邊度，而唔係就咁list晒你所有的工作「歷史」。可以試下以比較浮誇的方式，係CV上面表達你做過的司儀經驗，加埋活動相片同埋介紹是次活動內容，如果識得多國語言的朋友，亦可以試下強調語言能力。因為要吸引活動主辦單位的眼球，就要將你的「力量」show出來，所以準備司儀的CV可以有別於其他求職者的CV。



如果說司儀是單靠一把口在台上說說笑笑就有錢收的工作，那麼剛才Jose 已很有生命力地把答案告訴大家！台上三分鐘，台下真的十年工，要磨練多久才可有出鞘的機會。在澳門既要十項全能，又要不斷進修，還要不斷擴闊人脈和眼界，所以你還以為司儀是單靠把口隨便說幾句就能賺錢的行業嗎？入行前，請好好準備自己，好好學習和把握所有機會。




戴顯揚 Jose 個人簡介：

於2008年畢業於美國加州大學聖地牙哥分校，主修傳意，副修戲劇。2004年參加由澳門工聯青年中心舉辦之<<潛能盡顯－全能MC大賽>>司儀訓練班後開始擔任各類型活動司儀，並於2010至2012年連續三年擔任該訓練班之籌委主任。2010年參與澳廣視舉行之<闖關—電視主持人大激鬥>且取得佳績。

近年積極發展為全方位司儀、主持及培訓導師，曾為多個政府部門、商業機構、酒店及社團主持活動。合作過的單位有民政總署、衛生局、威尼斯人渡假村酒店、金沙酒店、四季酒店、永利澳門、銀河度假村、悅榕莊、澳門美高梅、新葡京、太陽劇團、Macau Business、澳門工會聯會總會、澳門街坊會聯合總會、澳門中華學生聯合總會、澳門大學、TVB週刊等等。曾任美國三藩市星島中文電台、香港WAZZUP 網上電台、藝駿電台及第一網絡電台主持。近年亦有參與多個廣告、短片及電視劇之演出。現擔任澳廣視 <家家有本事>節目主持。

Facebook Page: https://www.facebook.com/josethemc

Weibo: http://weibo.com/u/2644903460



戴顯揚 Jose 最新作品：




By Sun-Career Contributing Writer

---