見工有如打仗，有時準備充足都好，面試中途梗會遇到啲無聊面試官問你啲廢爆問題，hea答又驚佢地嬲，認真mode又唔知點答先夠得體。

澳門筍工網訪問咗唔少求職者，了解佢地對過去面試經驗同埋面試問題的想法，發現唔少求職者都唔明白面試官果一刻問呢條廢爆問題的動機係咩，咁到底啲問題係咪真係咁廢？就由澳門筍工網整理一下呢啲傳說中的爆廢問題啦：

1.) 可唔可以講下你有咩工作經驗？

求職者(心諗)：其實，你有冇睇過我份CV，寫哂出黎啦，每一份工工作內容都列埋point出黎，你咁hea問我會唔會廢咗啲呀？唔通要我對住份CV照讀出黎咩。

筍工網：其實，面試官係比機會你講啲重點出黎，想睇下你講出黎啲point同你而家見緊的呢份工match唔match，唔match的話就再睇下有冇第二啲啱你的工作。你估啲HR真係唔睇你份CV咩，佢比緊機會你表現下最好的一面呀，唔好浪費機會呀飛雲。

2.) 可唔可以講下離職理由？

求職者(心諗)：而家澳門咁難請人個個都跳來跳去架啦。你問黎都多餘！咁…. 份工做得唔啱咪唔做囉，姐/哥做得唔高興咪走囉，出面人工高啲我咪走囉，唔通我上次係office食榴槤搞到個潔癖女上司針對我所以我要走又話你知咩。

筍工網：同你interview係為咗了解你，咁梗係會問下原因啦，加上如果你之前啲工作在職時間短，面試官好需要了解下你點解咁冇loyalty。如果唔係公司請咗你之後，幾個月再唔係幾日你就走咗HR咪捉蟲！

3.) 如果有人出得高薪過我地公司，你會選擇去邊一間工作？

求職者(心諗)：廢話，唔使問都知係高人工啲果間啦，轉工都係為咗搵多啲錢姐。但咁答一定死得，答話點都會選擇你地公司你實追問點解，呢條廢得黎好易中伏。

筍工網：呢條問題其實可圈可點，公司會咁問係想睇下你會唔會好jumpy (驚請咗你，你又嫌人工低搵過另一份)，同埋睇下你係咪只係睇錢工作 (姐係睇下你係咪斤斤計較的人)，所以，如果比人問到呢題，可以試下反問佢關於公司晉升機會或者有冇其他benefit，之後話會對比下再決定，咁樣答就可攻可守啲。

4.) 如果你辭職，而家老闆話升你職，你重走唔走?

求職者(心諗)：我老細講野你都好信。唉，傷心事唔好再提啦，就係冇得升我先要走，而家係澳門唔跳一跳邊有得升，魚唔過塘邊有得肥丫。

筍工網：嗱，啲面試官係想睇下你想轉工的決心、對佢地公司的興趣，同埋睇你會唔會乘機講而家老闆壞話，小心中伏。

5.) 你覺得你將來可以去到咩位置？

求職者(心諗)：唔好玩啦，我而家都未搞得掂我自己，我又唔係來見啲高級管理層職位，重問我將來想點。唔通要我答：其實我想做你果個位，我計劃五年後有500萬首期去買樓。同埋其實我只係想安安樂樂打份工，想我去啲咩位置姐。

筍工網：雖然明知人生好多時都係計劃趕不上變化，但如果冇計劃就一定冇進步，問呢個問題，係因為要測試下你個人組織力同埋誠意，曾經都有唔少求職者真係冇誠意到就咁答冇乜計劃，真係即刻扣哂分。



By Sun-Career Contributing Writer

---